Agarsiistuu Raawwii Ijoo (Key Performance Indicators_KPI) ilaalchisuun leenjiin hubannoo uumuu kenname
- Details
- Category: Latest
- Published on Wednesday, 02 April 2025 08:10
- Written by Super User
- Hits: 44
Dhaabbilee barnootaa Olaanoo fooyyessuuf Ministeerri Barnootaa Federaalaa karoora hojiirra oolchuu jalqabe keessaa ARI isa tokko yommuu ta’u, Ministeera Barnootaa irraa kaasuun hanga sadarkaa gadiitti hojii safaranii kennuun walharkaa fuudhuun hojjechuu irratti kan xiyyeeffatu ta’uu ibsameera.
Kunis qaamni hojjetuufi hojjechiisu mallatteessee kennuufi fudhachuudhaan kan ittiin madaalamu akka ta'es himameera. Leenjii kana irratti diinonni, ittigaafatamtoonni muumeewwaniifi durabuutonni kutaa hojii garaa garaa argamaniiru.
Sagantaa kana irratti Dr. Malkaa Hiikaa Itti Aanaa Pirezidaantii Dhimmoota Akkaadaamii akka jedhanitti, kaayyoon leenjii kanaa dhimma kana irratti hubannoo uumuu yeroo ta’u, namni kamiyyuu waan hojjetu beekee hojjechuun isaan madaalamuu akka qabuufi hojii kallattiin nu ilaallatu safarree mallatteessinee fudhachuun bu’aa argamu madaaluuf nufayyada jedhan; Kunimmoo milkaa’innis ta’e kufaatiin Yuunivarsiitii hojjetaa hunda akka ilaallatu dubbatan. Kanaaf, qaamni hundi sadarkaa isaatti hojii itti kennamu fudhachuun bu’aa argamsiisuuf hojjechuu qaba jedhan.
Haaluma kanaan, hubannoo uumuuf Itti Aanaa Pirezidaantii Qorannoofi Ce’umsa Teeknoloojii kan ta'an Dr Dirribaa Dhibbaa waraqaa “#Performance_Contracting_in_Higher_Education: #a_highlight” yookiin Ibsa Gabaabaa ''Waliigaltee Raawwii Barnoota Olaanaa Keessatti'' jedhu dhiyeessaniiru. Dhiyeessii isaanii keessattis sakatta’a ministeerri barnootaa taasiseen hanqinaaleen hedduu dhaabbilee barnootaa Olaanaa keessatti mull'achuu ibsanii hanqina qulqullina barnootaatiin, madaallii qulqullina qabu geggeessuu dhabuu, hanqinni ogummaa jiraachuu, fayyadamni teeknooloojii gadi bu'aa ta'uu, amanamummaa dhabuu, xiyyeeffannoo kennuu dhiisuu, ittigaafatamummaa bahuu dadhabuufi kan kana fakkaatan akka argannoo inootti eeraniiru. Dhimmoota kanaafi kanneen biroo irratti jijjiiramni barbaachisaa ta’uu ibsaniiru kanaafimmoo, hojiin bu’a qabeessi akka hojjetamuuf Agarsiistuwwan Raawwii ijoo (#ARI) xiyyeeffannoofi dursi kennameefii hojjetamuu qabantu adda baafaman jedhan.
Itti dabaluunis, hojiiwwan seektara garaa garaa keessatti ijoo ta’anii dursi kennameef kanneen kam akka ta’aniifi eenyu itti gaafatamummaa akka fudhachuu qabu, Itti Aanaan Pirezidaantii Bulchiinsaafi Misoomaa kan ta'an Dr Olaanaa Dabal dhiyeessaniiru.
Pirezidaantii Yuunivarsiitii Wallaggaa Dr Tasfaayee Lammaa gama isaaniin #ARI Yookiin #KPI hojjiirra oolchuun faayidaa hedduu akka qabu kaasaniiru. Fooyya’iinsa dhaabbilee barnootaatiif shoora olaanaa akka qabuufi kunis ciminaafi hanqina dhaabbileen barnootaa qaban adda baasuuf akja gargaara himan. Sadarkaa hundatti itti gaafatamummaa mirkaneessuufi bulchiinsa gaarii mirkaneessuuf akka gargaarulle kaasan Dr. Tasfaayeen. Karoora dheeraa Dhaabbileen Barnoota Olaanaa akka ofdanda'aniifi of bulchanif taa'es guuttachaa deemuuf akka gargaarus eeraniiru.
Dhimmoota ka’an irratti gaaffiifi yaadi hirmaattota irraa ka’ee deebiin bal’aan itti kennameera. Dhumarrattis, sirni mallattoofi walharkaa fuudhiinsa ARI Pirezidaantii Yuunivarsiitii Itti Aantota pirezidaantii gidduutti geggeeffameera.