Mariin Hojjettootaafi Ogeessaa Fayyaa Hospitaalaa waliin gaggeeffame
- Details
- Category: Latest
- Published on Wednesday, 02 April 2025 08:15
- Written by Super User
- Hits: 38
Eeggataan Pirezidaantiin Yuunivarsiitii Wallaggaa Dr Tasfaayee Lammaafi Hoggantoonni Olaanoo Yuunivarsiitichaa Hojjettoota Hospitaala Kompireensiivii Ispeeshaalaayizdii waliin mari'atan
Miseensonni Hoggansa Olaanaa Yuunivarsiitii Wallaggaa, Dr Tasfaayee Lammaa, Pirezidaantii Yuunivarsiitichaan durfamu guyyaa gaafa (11/07/2017) Hospitaala Kompireensiivii ispeeshaalaayizdiitti argamuun hojjeettoota bulchiinsaafi ogeessota fayyaa waliin marii taasisaniiru.
Dr Tasfaayee Lamma marii kana irrattis haasaa taasiisaniin Hojjettoota Hospitaalichaa waliin walbaruuf argamuu isaaniitiif gammachuu itti dhagahame ibsanii, yeroo garaa garaatti marii dhimma Yuunivarsiitii Wallaggaa ilaallatu hojjettoota bulchiinsaafi Akkaadaamii Yuunivarsiitiicha waliin marii taasiisaa kan turan ta’uu isaanii eeraniiru.
Kaayyoon marii kana inni ijoon hojjettoota hospitaalichaa waliin walbaruun ergama Yuunivarsiitii galmaan gahuuf waliin hojjechuufi haala tajaajila yaalii hospitaalichi kennuu tajaajila si’ataa fi qulqullina qabu kennun itti quufinsa maamilaa mirkaneessuufi Tajaajilli kennamuu gama hundumaan daran ammayyeessuun, hojiilee gama baruu barsiisuu, qorannoofi qo’annoon, tajaajila hawaasaa, pirojeektota garaa garaa bocuun hawaasa naannoof bu’aa ta’uu danda’aan irratti mariin kun kan xiyyeeffatee ta’uu himaa Dr Tasfayeen.
Inistitiyuutiin Saayinsii Fayyaa hojii baruufi barsiisuu, tajaajila yaalii kennuu cinatti giddu gala ''Health and Demographic Survilliance System (HDSS) hundeessuun akka barbaachisu yaadachiisan. Barnoonni Fayyaaa kallattii xiyyeeffannoifi giddu gala qhlqullinaa Yuunivarsiitichaa keessaa tokko ta'uu kan himan Dr Tasfaayeen, qorannoo gaggeessuun daataa/ragaalee wayitaawaa imaammataaf galtee ta'uu danda'an maddisiisuun akka barbaachisu dubbatan. Ija kanaan yommuu ilaalamu
Inistitiyuutiin Saayinsii Fayyaa akka waliigalaatti Hospitaalli Kompireensiivii ispeeshaalaayizdiias akka wiirtuu tajaajila hawwaasaafi diree akkaadaamiitti ulaagaalee madaallii hospitaalota Kompireensiivii ispeeshaalaayizdiitti eessa jira? Bulchiinsi isaa maal fakkaata? Kenninsa tajaajilaarratti itti quufinsi maamilaa (keessaafi alaan) akkamitti madaaltuu? kan jedhuufi kan kana fakkaatan karoora tarsiimawaa Hospitaalicha guddisurratti yaadota galtee ta'uu danda'an akka dhiyeessan gaafatan.
Marii kana irrattis hojjettotni hospitaalicha yaada kaasaniin akka jedhaniitti hospitaalli Kompireensiivii ispeeshaalayizdii Yuunivarsiitii Wallaggaa erga hundeffamee asitti tajaajila yaalii kennaa kan jiruu fi gama baruuf barsiisuunis ta’ee qorannoofi qo’annoon, tajaajila hawaasaa garaa garaa irratti dammaqinaan hirmaacha kan ture ta’uu ibsaniiru. Maashinoota Baayoobsii, CT Scan bitamee tajaajilatti galuu, MRI immoo walakkaa ol kaffalamee eegamaa jiraavhuu kaasan. Yaalii olaanaaf dhukkubsatoita daddabarsun hanga ta'e hambisuu himan. Sagantaalee Barnootaa afur ''Residentship'' eegaluu; tajaajila kennaman babal'isaa turuu himan.
Haata'u malee, baayina ogeessota Ispeeshaaliistii qabuun yeroo madaalamu humna isaa guutuun tajaajila kennaa akka hinjirre kaasan. Hanqinni eeshaalee tajaajila yaaliif oolani jiraachuu; qabiinsa hojjettoota irrattis hanqinni kan mul’atu ta’uu; tajaajila yaalii hospitaalichi kennuu teeknooloojii waliin walsimsiisuun dhabuufi tajaajila yaaliifi adeemsa baruu fi barsiisuun kennamaa jiruu kan dubatti harkisee ta’uu; hanqinni dhiyeessi qorichaa fi Oksijiinii mudachaa kan jiru ta’uu kaasan.
Dabalataanis, walitti hidhamiinsi (Acadamic and Clinical staff integration) Akkaadamikii fi kilinikaala sadarkaa hoggansaa yookiin qindeessitoota qofatti kan hafe ta’uufi hojjettoota dubartootaa hospitaalichaaf wiirtuun kunuunsa Daa’immanii Guyyaa dhibuu; Tajaajiloonni kennaman baayyaachaa dhufuurraa kan ka'e yaalii olaanaa kan barbaadan hedduummachaa jiraachuun, dhiphinni iddoo jiraachuu, boordiin hospitaalichaafi manajimantiin Yuunivarsiitii yeroo yeroon hojjettoota mariisisuun dhibuu, bultiin barattootaafi hospitaalli walirraa fagaachuu, hanqina geejjibaa fi kkf akka ijootti ka'eera. Laaboraatoorii ammayyaawaa gurmeessuu akka barbaachisuus kaasan.
Marii kana irratti yaada xumuraa kaasaniin akka jedhaniitti Dr Tasfaayeen marii kana irraa waan hojiif galtee ta’uu hedduu kan argatan ta’uu himuun, hojjetootni hospitaalicha martii tajaajila yaalii si’ataa ta’ee fi qulqullina qabu hawaasa isaaf kennuu akka qabu dubbatan. Ogeessonniifi hojjettonni hospitaalichaa martii yaalii weerara kooviidii dabalatee haala nageenyaa rakkisaa ture keessatti cichoomina agarsiistanii hawwaasa keessan tajaajiltaniif Yuunivarsiitiin Galata gudda isinii dhiyeessa jedhan.
Sadarkaafi Qulqullina itti tajaajila kenninuu fooyyeessaa, ammayyeessaa deemuu male isa ittin beekamaa tureerraa hanqachuu hinqabuu jedhan.
Haata'u malee, haala kenninsa tajaajilaafi qabiinsa maamilaa, ogeessonni hojiirra jiraachuu irratti komee jiruu fooyyeessuun akka barbaachisu himan. Dabalataanis, shaakkallii badaa hojjettoonni tokko tokko raawwachuun maqaa hospitaalichaafi hawwaasa hospitaalichaa miidhan irrattis itti gaafatamummaa mirkaneessaa deemuun nibarbaachisaa jedhan, Dr Tasfaayeen.
Kan malees, yaadotaafi rakkoolee furmaata isaanii waliin kaastan walumaan itti gaafatamummaa fudhannee guuttachaa deemuu qabna jedhan. Kanaafis, karooraa yeroo gabaabaa keessatti rawwataman adda bafannee irratti hojechu fi hojiilee yeroo dheeraa fudhatannis karooraan qabannee irratti hojjechuu qabana jedhaniiru. Bulchiinsi hospitaalichaas sirna diriirsuu, iftoominaafi itti gaafatamummaa mirkaneesaa deemuun akka eegamuus akkasuma.
Kaayyoon keenyi inni ijioon Hawaasa keenya tajaajiluu waan ta’eef ogeessooni fi hojjetootni bulchiinsa galma gahiinsa keenyaaf waliin tumsiinee hospitaala keenya sadarkaa barbaadamee irran gahufi filannoo jalqabaa namoota hundumaa akka ta’uuf waliin dhimuu qabnaa jedhan.
Xumura irrattis gaaffii fi yaadolee hojjettoota irra ka’aan irratti mariin erga tasiifamee booda Itti aantota Piresidaantiin deebiifi ibsi kennameera; yaadoota ka’an kan biroos akka galteetti fudhachuun kan irratti hojjetamu ta’uu hubachiisaniiru.